Міністэрства культуры Рэспублікі Беларусь

24 мая адкрыліся Дні культуры Беларусі ў В'етнаме - дэлегацыя нашай рэспублікі на чале з Першым намеснікам Міністра культуры Валерыем Грамадой прыбыла ў Хашымін.

Адбылася сустрэча афіцыйнай дэлегацыі з намеснікам Старшыні Народнага камітэта г. Хашыміна Зыонгам Аня Дыкам.

У сустрэчы прынялі ўдзел Надзвычайны і Паўнамоцны Пасол Рэспублікі Беларусь Уладзімір Баравікоў і Генеральны консул Рэспублікі Беларусь у г.Хашымін Руслан Варанкоў.

У ходзе сустрэчы абмеркаваны пытанні супрацоўніцтва ў галіне культуры з г. Хашымінам, намечаны перспектывы яго далейшага развіцця.

Звяртаючыся да намесніка Старшыні Народнага камітэта г. Хашыміна, Першы намеснік Міністра культуры Валерый Грамада адзначыў каласальную работу па развіццю двухбаковага супрацоўніцтва Беларусі і В'етнама, у тым ліку і ў галіне культуры.

"У мінулым годзе ў г.Хашыміне было адкрыта Генеральнае консульства Беларусі. Гэты крок з'яўляецца яскравым сведчаннем таго, што Беларусь надае прыярытэтнае значэнне сваім адносінам з В'етнамам. Наша краіна заўсёды з павагай і цеплынёй ставілася да в'етнамскага народа, вядомага сваёй ідэйнай стойкасцю і працавітасцю, старажытнай гісторыяй і багатымі культурнымі традыцыямі", - падкрэсліў Валерый Грамада.

Першы намеснік Міністра адзначыў вялікі патэнцыял міжрэгіянальных абменаў у культурна-гуманітарнай сферы паміж г.Мінскам і г.Хашымінам, якія ў 2008 годзе атрымалі статус гарадоў-пабрацімаў.

"Перакананы, што патэнцыял нашага двухбаковага міжкультурнага ўзаемадзеяння далёкі ад вычарпання. Важнымі напрамкамі могуць стаць устанаўленне прамога супрацоўніцтва паміж установамі адукацыі ў сферы культуры, мерапрыемствы па абмене кнігамі паміж бібліятэкамі, гастролі тэатраў, арганізацыя паказу кінастужак адзін аднаго. У Мінску будуць рады правядзенню Дзён горада Хашыміна. Пры неабходнасці Міністэрства культуры акажа садзейнічанне ў правядзенні неабходных мерапрыемстваў. Мы будзем рады ўключэнню ў міжкультурны дыялог з Хашымінам і іншых рэгіёнаў Беларусі", - заявіў Валерый Грамада.

Першы намеснік Міністра культуры Рэспублікі Беларусь выказаў упэўненасць, што культурныя абмены паміж дзвюма краінамі будуць садзейнічаць далейшаму ўмацаванню дружалюбных адносін, развіццю супрацоўніцтва і ўмацаванню міжасобасных сувязей.

Адбыліся перагаворы Першага намесніка Міністра культуры Рэспублікі Беларусь Валерыя Грамады і намесніка Міністра культуры, спорту і турызму В'етнама Та Куанг Донг

У ходзе перагавораў бакі абмеркавалі стан і перспектывы беларуска-в'етнамскага супрацоўніцтва ў галіне культуры, правядзенне Дзён культуры В'етнама ў Беларусі, аказання садзейнічання ўстанаўленню прамога супрацоўніцтва паміж арганізацыямі культуры абедзвюх краін, іншыя актуальныя пытанні двухбаковага ўзаемадзеяння.

Па выніках перагавораў паміж Міністэрствам культуры Рэспублікі Беларусь і Міністэрствам культуры, спорту і турызму В'етнама падпісана Праграма супрацоўніцтва ў галіне культуры на 2023-2025 гг.

Ад беларускага боку Праграму падпісаў Першы намеснік Міністра культуры Рэспублікі Беларусь Валерый Грамада, ад в'етнамскага боку - Намеснік Міністра культуры, спорту і турызму В'етнама Та Куанг Донг.

Бакі дамовіліся развіваць і ўмацоўваць супрацоўніцтва ў галінах культуры і мастацтва, садзейнічаць устанаўленню прамога супрацоўніцтва паміж бібліятэкамі, музеямі, тэатрамі, а таксама арганізацыямі, якія займаюцца пытаннямі рэстаўрацыі, захавання і развіцця культурнай спадчыны абедзвюх краін, развіццю супрацоўніцтва паміж творчымі саюзамі, аб'яднаннямі і арганізацыямі абедзвюх краін.

Асаблівая ўвага будзе ўдзелена пытанням падрыхтоўкі і правядзення Дзён культуры Рэспублікі Беларусь у Сацыялістычнай Рэспубліцы В'етнам і Дзён культуры Сацыялістычнай Рэспублікі В'етнам у Рэспубліцы Беларусь.

Сярод асноўных напрамкаў супрацоўніцтва - абмен спецыялістамі, выкладчыкамі, аспірантамі, студэнтамі, стажорамі, якія займаюцца вывучэннем музычнага, тэатральнага, цыркавога, выяўленчага і народнага мастацтва, бібліятэчнай і музейнай справы, аховы і рэстаўрацыі помнікаў, а таксама экспертамі для ўдзелу ў канферэнцыях, сімпозіумах і сустрэчах, якія праводзяцца ў абедзвюх краінах.

Бакі таксама дамовіліся садзейнічаць устанаўленню прамых сувязей паміж арганізацыямі кінематаграфіі абедзвюх краін, а таксама заахвочваць правядзенне паказаў фільмаў другога боку на сваёй тэрыторыі і ўдзел у міжнародных кінафестывалях, якія праводзяцца на тэрыторыі абедзвюх краін.

У Музеі горада Хашыміна адбылася ўрачыстая цырымонія адкрыцця выстаўкі "Беларусь вачыма мастака" ў рамках правядзення Дзён культуры Беларусі ў В'етнаме

У цырымоніі прынялі ўдзел Першы намеснік Міністра культуры Рэспублікі Беларусь Валерый Грамада, Надзвычайны і Паўнамоцны Пасол Рэспублікі Беларусь у В'етнаме Уладзімір Баравікоў, Генеральны консул Рэспублікі Беларусь у г. Хашыміне Руслан Варанкоў, прарэктар Беларускай дзяржаўнай акадэміі мастацтваў Ганна Конанава.

На цырымоніі адкрыцця выставы прысутнічалі таксама прадстаўнікі міністэрстваў і ведамстваў В'етнама, дыпламатычных місій замежных краін, міжнародных арганізацый у г. Хашыміне.

Увазе гасцей і наведвальнікаў выстаўкі для знаёмства з сучасным мастацтвам Беларусі прадстаўлена больш за 30 работ маладых і ўжо вядомых мастакоў Беларусі – Ганны Садоўскай, Антона Вырво, Глеба Отчыка і Ганны Конанавай.

У Оперным тэатры г.Хашымін вялікім гала-канцэртам беларускіх майстроў мастацтваў адбылося ўрачыстае адкрыццё Дзён культуры Беларусі ў В'етнаме

Звяртаючыся з прывітальным словам да ўдзельнікаў і гасцей канцэрта, Першы намеснік Міністра культуры Рэспублікі Беларусь Валерый Грамада адзначыў, што беларуска-в'етнамскі дыялог развіваецца ў розных напрамках і сферах эканомікі, але менавіта культура і мастацтва выконваюць асаблівую місію - місію па духоўным збліжэнні людзей.

"Як адзначаў Прэзідэнт нашай краіны Аляксандр Рыгоравіч Лукашэнка - "Культура, гэта той духоўны стрыжань, які дапамог нашаму народу выстаяць у самых жорсткіх выпрабаваннях". І ў гэтым мы падобныя да В'етнамскага народа, які ў розныя гады мужна адстойваў сваю незалежнасць. Валодаючы векавой гістарычнай спадчынай і багатымі культурнымі традыцыямі нашы народы маюць права ганарыцца старонкамі сваёй гісторыі і здольныя ўзбагаціць адзін аднаго", - падкрэсліў Валерый Грамада.

Першы намеснік Міністра культуры Беларусі звярнуў увагу, што праграма Дзён культуры Беларусі аб'ядноўвае традыцыі і дасягненні розных пакаленняў, прадэманструе багацце і бязмежную прыгажосць беларускага нацыянальнага мастацтва.

"Беларускія артысты з нецярпеннем чакалі гэтай сустрэчы. Праз мастацтва яны перададуць вам творчае прывітанне ад мільёнаў беларусаў, якія ведаюць В'етнам як добрага саюзніка і сябра нашай краіны. Шчыра спадзяюся, што і сёння, і заўтра - у правінцыі Барыя-Вунгтаў - глядач адкрые для сябе новыя яркія імёны на небасхіле выканальніцкага майстэрства.

Несумненна, мы з нецярпеннем будзем чакаць візіту ў адказ творчай дэлегацыі В'етнама ў сталіцу нашай краіны г.Мінск", - заявіў Валерый Грамада.

У маляўнічым канцэрце, які адкрыў Дні культуры Беларусі ў В'етнаме, прынялі ўдзел гурт "Аура", Заслужаны калектыў Рэспублікі Беларусь Беларускага дзяржаўнага ансамбля "Песняры", заслужаныя артысты Рэспублікі Беларусь Вікторыя Алешка, Алена Ланская, Жанет.

Па добрай традыцыі на канцэрце выступіў калектыў, які прадстаўляе адзін з рэгіёнаў Беларусі - Заслужаны калектыў Рэспублікі Беларусь - ансамбль песні і танца "Медуніца" з Магілёўскай вобласці.

У рамках правядзення Дзён культуры Беларусі ў В'етнаме беларуская дэлегацыя наведала харэаграфічную школу і філармонію г. Хашыміна.

У ходзе наведвання паміж Белдзяржфілармоніяй і Філармоніяй г. Хашыміна дасягнута дамоўленасць аб развіцці адносін, падпісанні Пагаднення аб супрацоўніцтве паміж установамі.

В'етнамскі бок таксама выказаў зацікаўленасць у супрацоўніцтве ў галіне харэаграфіі па падрыхтоўцы і перападрыхтоўкі спецыялістаў, абмене выкладчыкамі.

25 мая мерапрыемствы Дзён культуры Беларусі ў В'етнаме прадоўжыліся ў правінцыі Барыя-Вунгтаў

У мэтах развіцця рэгіянальнага супрацоўніцтва беларуская дэлегацыя правяла сустрэчу з намеснікам Старшыні Народнага камітэта правінцыі Барыя-Вунгтаў Дангам Мінем Тхонгам.

Таксама жыхары і госці в'етнамскай правінцыі сталі гледачамі вялікага гала-канцэрта беларускіх майстроў мастацтваў.

Правядзенне абменных Дзён культуры з В'етнамам стала добрай традыцыяй. У 2017 годзе праведзены Дні Культуры Беларусі ў В'етнаме, а ў 2018 годзе - Дні Культуры В'етнама ў Беларусі.

Культурнае супрацоўніцтва паміж Беларуссю і В'етнамам ажыццяўляецца ў рамках Дагавора паміж Міністэрствам культуры Рэспублікі Беларусь і Міністэрствам культуры, спорту і турызму Сацыялістычнай Рэспублікі В'етнам аб супрацоўніцтве ў галіне культуры і мастацтва, падпісанага 21 снежня 2007 г. у г.Мінску.