Міністэрства культуры Рэспублікі Беларусь

8 верасня ў Нур-Султане (Казахстан) адбылося XXXVII пасяджэнне Савета па культурным супрацоўніцтве дзяржаў-удзельніц СНД. Ад беларускага боку ўдзел у пасяджэнні прыняў Першы намеснік Міністра культуры Валерый Грамада і начальнік аддзела па кінематаграфіі Міністэрства культуры Кацярына Панамарова.

У рамках пасяджэння разгледжана 17 пытанняў. Сярод іх - выкананне Асноўных мерапрыемстваў супрацоўніцтва ў галіне культуры на 2021-2025 гады і Плана мерапрыемстваў па правядзенні ў СНД у 2022 годзе Года народнай творчасці і культурнай спадчыны. Таксама ўвага ўдзелена дзейнасці Рабочай групы па кінематаграфіі дзяржаў-удзельніц СНД. З дакладам выступіў Першы намеснік Міністра Валерый Грамада.

Першы намеснік Міністра культуры Рэспублікі Беларусь Валерый Грамада падчас XXXVII пасяджэння Савета па культурным супрацоўніцтве дзяржаў-удзельніц СНД расказаў, што ў рамках работы Савета кіраўнікоў кінастудый краін СНД у 2019-2022 гг. прыняты рашэнні аб сумеснай вытворчасці шэрагу фільмаў. Так, Нацыянальная кінастудыя «Беларусьфільм» сумесна з кінастудыяй «Узбекфільм» вядзе работу па вытворчасці фільма пад рабочай назвай «Казбек», які апавядае пра Героя Савецкага Саюза, ураджэнца Узбекістана Мамадалі Топвальдыева, які ў гады Вялікай Айчыннай вайны ўзначальваў разведвальны атрад партызанскай брыгады «Чэкіст», якая дзейнічала на тэрыторыі Беларусі.

Сумесна з Расійскай Федэрацыяй рэалізуюцца праекты пад працоўнымі назвамі «Аліўе», «Навагодні экспрэс». У распрацоўцы знаходзяцца дакументальны праект «Апошнi сведка» - сумесны кінаальманах краін СНД, прымеркаваны да 80-годдзя Перамогі.

Акрамя таго, Нацыянальная кінастудыя «Беларусьфільм» з узбекскімі партнёрамі плануе стварэнне дакументальнага фільма, прысвечанага Якубу Коласу. Перспектыўным напрамкам таксама з'яўляецца ўзаемадзеянне кінаархіваў дзяржаў-удзельніц СНД і супрацоўніцтва пры падрыхтоўцы кадраў для кінематаграфіі.

Напярэдадні XXXVII пасяджэння Савета па культурным супрацоўніцтве дзяржаў-удзельніц СНД у Нур-Султане адбылося афіцыйнае адкрыццё Міжнароднай выставы «ART EXPO». У Нацыянальным музеі Казахстана прадстаўлены работы мастакоў і майстроў прыкладнога мастацтва краін Садружнасці. Удзельнікі выставы змогуць пазнаёміцца ​​з работамі сучасных беларускіх мастакоў Глеба Отчыка і Юрыя Крупянкова. Выстава працягнецца да 10 верасня.