Міністэрства культуры Рэспублікі Беларусь

Урачыстае адкрыццё XXXI Міжнароднага фестывалю мастацтваў «Славянскі базар у Віцебску» прайшло на галоўнай сцэнічнай пляцоўцы - у Летнім амфітэатры.

Творчыя калектывы і выканаўцы ўсіх узростаў прыехалі з розных краін у гэты халаднаваты ліпеньскі вечар, каб сагрэць гледачоў іскрамі свайго таленту і атрымаць у адказ душэўную цеплыню і ўдзячныя ўсмешкі. Прызнанні ў каханні фестывалю на розных мовах не раз гучалі са сцэны, роўна як і падзякі форуму за дарогу ў жыццё, новыя магчымасці і новых сяброў.

Дзяніс Майданаў, Рыгор Лепс, Зара, Рухія, Ірына Дарафеева, Анатоль Ярмоленка і ансамбль «Сябры», «Песняры», Руслан Аляхно, Алена Ланская - гэтыя і многія іншыя вядомыя, любімыя, доўгачаканыя артысты, госці, сябры фестывалю павіншавалі сваімі нумарамі Віцебск і яго жыхароў са святам. Спевакі выконвалі ўсім знаёмыя кампазіцыі, у тым ліку пад акампанемент аркестра. Опера, дыска, рэтра-хіты - усё заходзіла на ўра! Харэаграфічныя нумары прымушалі ўсю глядзельную залу скакаць на месцы, а цыркавыя трукі – заміраць ад захаплення. Рэдкі для фестывальнай сцэны, але дзіўна кранальны балет падарыў гасцям канцэрта адчуванне лёгкай казкі.

На сцэне фестывалю рабілася сапраўдная хімія, толькі творчая. Маладая энергія пераклікалася з харызмай вопытных спевакоў, і атрымліваўся цудоўны сімбіёз. Выступленні любімых артыстаў выклікалі выбухі авацый у глядзельнай зале. А яркай кропкай урачыстай цырымоніі стаў святочны феерверк.

Крыніца: БЕЛТА