Міністэрства культуры Рэспублікі Беларусь

Міністр культуры Анатоль Мечыслававіч Маркевіч правёў сустрэчу з дэлегацыяй правінцыі Ганьсу Кітайскай Народнай Рэспублікі на чале з Чжан Юнся - начальнікам Дэпартамента прапаганды, членам пастаяннага камітэта правінцыі Ганьсу.

У рамках візіту гэтай дэлегацыі абмяркоўваліся пытанні беларуска-кітайскага супрацоўніцтва ў сферы культуры. З улікам сучасных міжнародных тэндэнцый і патэнцыялу абедзвюх дзяржаў намечаны перспектывы ўзаемадзеяння, заснаваныя на багатых традыцыях культурнага абмену.

На сённяшні дзень краіны праводзяць на сваіх тэрыторыях «Дні культур», «Дні нацыянальнага кіно», актыўна ўдзельнічаюць у кінафестывалях, сумесна рэалізуюць праекты кінавытворчасці. Ужо некалькі гадоў у Беларусі праходзіць «Вясёлае свята Вясны», прысвечанае Кітайскаму Новаму году, і «Тыдзень турызму і культуры Кітая». Арганізоўваюцца фотавыставы, форумы, семінары і іншыя мерапрыемствы ў рамках «Года рэгіёнаў Кітая і Беларусі». На дзяржаўным узроўні падтрымліваецца абмен і супрацоўніцтва паміж прафесійнымі ўстановамі культуры і мастацтва, такімі як мастацкія музеі, тэатры.

Вялікая ўвага надаецца развіццю галіны адукацыі.

Правінцыя Ганьсу мае больш за 2200-гадовую гісторыю. Там знаходзяцца аб'екты сусветнага значэння, што прываблівае турыстычную цікавасць. У правінцыі ёсць участкі Вялікай Кітайскай сцяны - аднаго з галоўных культурных здабыткаў Кітая, шмат помнікаў прыроды і музеяў. На сённяшні дзень актыўна развіваецца культура гарадоў правінцыі, якія беражліва захоўваюць гістарычныя помнікі, найбагатыя артэфакты - будыйскія храмы з унікальнымі скульптурамі, карцінамі, фрэскамі.