Министерство культуры Республики Беларусь

Калегіяй Міністэрства культуры, пасяджэнне якой адбылося 25 верасня 2013 года, разглядалася пытанне аб наданні статусу “Культурная сталіца Беларусі 2014 года”. Прэтэндэнтамі былі Маладзечна і Гродна. Абодва гарады прадставілі прэзентацыі. Па выніках абмеркавання Культурнай сталіцай аднагалосна абраны горад Гродна. Гэта адзін з найстаражытнейшых гарадоў Беларусі. Ён унікальны тым, што да гэтае пары захаваў сваю гісторыю (ад ХІІ стагоддзя) у шматлікіх помніках гісторыі і культуры, у планіроўцы гарадскіх кварталаў. Непараўнальную адметнасць і турыстычную прывабнасць маюць Барысаглебская (Каложская) царква, Стары і Новы замкі, чатыры ўнікальныя касцёлы, Свята-Ражджаства-Багародзічны манастыр, сінагога, лютаранская кірха, квартал палацаў Агінскіх, Браніцкіх, Радзівілаў, Храптовічаў, помнікі архітэктуры часоў гродзенскага старасты Тызенгауза і мноства іншых, што дае падставы Гродна звацца “горадам-музеем”. У розныя часы ў Гродна жылі і валадарылі князі і каралі Вітаўт, Давід Гарадзенскі. Стэфан Баторый, Ян ІІІ Сабескі, Станіслаў Аўгуст Панятоўскі, Бона Сфорца. Тут пабывалі цар Пётр І, каралі Аўгуст ІІ і Карл ХІІ, Тадэвуш Касцюшка, П.А.Сталыпін. З гэтым горадам звязаны імёны вучонага Ж.Э.Жылібера, пісьменнікаў і паэтаў Э.Ажэшкі, М.Багдановіча, В.Быкава, А.Карпюка, Д.Бічэль-Загнетавай, мастака Л.Бакста. Сучасны Гродна імкліва развіваецца, не страчваючы сваёй старажытнай своеасаблівасці. Тут праводзіцца каля 20 міжнародных, рэспубліканскіх і рэгіянальных фестываляў і конкурсаў. У 2012 годзе тут быў праведзены Першы нацыянальны музейны форум. Гродна - сталіца аднаго з самых маляўнічых фестываляў краіны - Рэспубліканскага фестывалю нацыянальных культур. 6-8 чэрвеня 2014 года тут пройдуць заключныя мерапрыемствы Х юбілейнага фестывалю. Яны стануць гучнымі і выразнымі акордамі ў партытуры мастацкіх імпрэз падчас акцыі “Гродна - культурная сталіца Беларусі”.