Міністэрства культуры Рэспублікі Беларусь

Барыс Святлоў адзначыў, што мясцовыя музеі адыходзяць ад таго, каб паказваць класічныя экспазіцыі, прысвечаныя гісторыі ад старажытных часоў і да нашых дзён. "Цяпер нашы музеі прыцягваюць наведвальнікаў непаўторнасцю экспанатаў, якія перадаюць каларыт сваёй мясцовасці. Гэта вельмі правільная стратэгія, яна прыносіць поспехі", - упэўнены міністр. У цэлым ён пазітыўна ацаніў развіццё беларускіх музеяў, якія імкнуцца адпавядаць сучасным патрабаванням. Наведаўшы, напрыклад, Нацыянальны гістарычны музей, можна ацаніць увесь маштаб беларускай гісторыі і культуры. У гэтыя дні музей святкуе сваё 60-годдзе.

Тут адкрылася юбілейная выстаўка "Нацыянальны гістарычны: дзень мінулы - дзень сённяшні", дзе наведвальнікі могуць убачыць некаторыя са скарбаў музея, сярод якіх каштоўнасці, што належалі вядомым родам Агінскіх і Чапскіх. Экспазіцыя таксама ўключае старыя фатаграфіі, дакументы, афішы, якія прадстаўляюць выстаўкі і праекты ад савецкага часу да нашых дзён. Міністр культуры 14 снежня прыняў удзел ва ўрачыстым мерапрыемстве з нагоды 60-годдзя музея і ў адкрыцці юбілейнай выстаўкі. У размове з журналістамі ён звярнуў увагу, што Нацыянальны гістарычны мае самы вялікі збор экспанатаў у краіне, на яго долю прыпадае 15 працэнтаў усіх музейных фондаў. Нацыянальны гістарычны музей Беларусі быў створаны 15 снежня 1956 года як Беларускі дзяржаўны гісторыка-краязнаўчы музей. Сваімі калекцыямі, традыцыямі ён непарыўна звязаны з беларускімі музеямі першай палавіны ХХ стагоддзя - Мінскім царкоўным гісторыка-археалагічным, Мінскім абласным, Беларускім дзяржаўным музеем, Беларускім гісторыка-этнаграфічным музеем імя Івана Луцкевіча ў Вільнюсе.

Даведачна:
У адпаведнасці з распараджэннем Савета Міністраў Беларускай ССР ад 15 снежня 1956 г. № 1728–р, Міністэрства культуры БССР атрымала дазвол на стварэнне з 1 студзеня 1957 г. арганізацыйнай групы для правядзення падрыхтоўчых работ па адкрыцці Беларускага дзяржаўнага гісторыка–краязнаўчага музея. Гэты ўрадавы дакумент, арыгінал якога сёння захоўваецца ў Нацыянальным архіве Рэспублікі Беларусь, пралівае святло на гісторыю вядучага гістарычнага музея краіны.

Нацыянальны гістарычны музей сваімі калекцыямі, традыцыямі непарыўна звязаны з беларускімі музеямі першай паловы ХХ ст. – Мінскім царкоўным гісторыка–археалагічным, Мінскім абласным, Беларускім дзяржаўным музеем, Беларускім гісторыка–этнаграфічным музеем імя Івана Луцкевіча ў Вільні. Мяняліся часы, неаднаразова менялася назва музея – Дзяржаўны музей БССР, Нацыянальны музей гісторыі і культуры Беларусі і, нарэшце, – Нацыянальны гістарычны музей Рэспублікі Беларусь – аднак нязменнай заставалася яго галоўная задача: зберагаць, вывучаць і прэзентаваць грамадскасці помнікі гісторыка–культурнай спадчыны. Сёння музей валодае самым буйным зборам у краіне, які налічвае звыш 450 тыс. прадметаў, гэта ўнікальныя калекцыі скарбаў, нумізматыкі, археалогіі, старадрукаў, нацыянальнага касцюма, дакументаў і іншыя.

Выстаўка “Нацыянальны гістарычны: дзень мінулы – дзень сённяшні”, прымеркаваная да юбілею ўстановы, складаецца з 2–х раздзелаў: першы з іх знаёміць з асобнымі старонкамі гісторыі музея праз дакументы, фотаматэрыялы, унікальныя музейныя прадметы – адны з іх з’яўляюцца своеасаблівымі візітоўкамі музея, іншыя паступілі ў збор на працягу апошніх гадоў. Срэбны кубак сям’і Агінскіх, падсвечнік Караля Чапскага, залаты імянны гадзіннік Старшыні Савета народных камісараў БССР Мікалая Галадзеда і шмат іншага знойдзе месца ў першым раздзеле выстаўкі. Другі раздзел пазнаёміць наведвальнікаў з экспазіцыйнымі і выставачнымі праектамі, рэалізаванымі музеем у розныя гады. Гэта афішы, самыя раннія з якіх датуюцца 1966 г. – за год да адкрыцця першай стацыянарнай экспазіцыі Дзяржаўнага музея БССР.