Міністэрства культуры Рэспублікі Беларусь

Беларусь адзначае 135 гадоў з дня нараджэння класіка айчыннай літаратуры Янкі Купалы. Прывітанне ўдзельнікам урачыстых мерапрыемстваў накіраваў Прэзідэнт Беларусі Аляксандр Лукашэнка. 7 ліпеня ў Мінску святкаванне юбілейнай даты прайшло каля помніка Песняру.

Тут адбылося ўскладанне кветак, вершы класіка чыталі беларускія артысты. Ва ўрачыстым мерапрыемстве прынялі ўдзел міністр культуры Рэспублікі Беларусь Барыс Святлоў, прадстаўнікі міністэрств і ведамств Рэспублікі Беларусь, Мінскага гарвыканкама, дыпламатычнага корпуса, жыхары горада Мінска. Заўтра, 8 ліпеня ў Купалаўскім мемарыяльным запаведніку "Вязынка" (Маладзечанскі раён) пройдзе рэспубліканскае свята паэзіі, песні і народных рамёстваў "З адною думкаю абса шчасці Беларусі ..." Вершы, прысвечаныя Янку Купалу, прачытаюць паэты Анатоль Крэйдзіч, Віктар Шніп, Міхаіл Башлакоў, Уладзімір Скарынкін, Уладзімір Мазго, Мікалай Шабовіч, Святлана Быкава і інш. Музычныя творы на вершы Янкі Купалы выканаюць Беларускі дзяржаўны ансамбль "Песняры", салістка Белдзяржфілармоніі Марына Васілеўская, фальклорна-этнаграфічны ансамбль "Неруш", вакальны ансамбль "Заранак" Нацыянальнага цэнтра музычных мастацтваў імя Уладзіміра Мулявіна, а таксама мастацкія калектывы Маладзечанскага раёна.


Вядучымі свята будуць артыстка Нацыянальнага акадэмічнага тэатра імя Янкі Купалы Валянціна Гарцуева і акцёр Рэспубліканскага тэатра беларускай драматургіі Андрэй Новік. Госці змогуць наведаць кірмаш рамёстваў і кніжны кірмаш.