Міністэрства культуры Рэспублікі Беларусь

Сцэна Вялікага тэатра ўрачыста ўпрыгожана. Гараць кандэлябры. Бліскаўкі сукенак, нагладжаныя каўняры і матылькі музыкаў сімфанічнага аркестра займаюць увагу гледачоў. Узмах дырыжорскай палачкі – і сімвалічна загучалі першыя ноты паланэза з оперы «Яўген Анегін» П.І. Чайкоўскага…

Канцэрт лаўрэатаў XVII Міжнароднага конкурсу імя П.І. Чайкоўскага пачаўся!

У ім прынялі ўдзел таленавітыя музыканты Беларусі і Расіі. А вечар у Вялікім - прымеркаваны да знамянальнай падзеі - дню падпісання дагавора аб стварэнні Саюзнай дзяржавы.

Са словамі прывітання да публікі звярнуўся Міністр культуры Рэспублікі Беларусь МАРКЕВІЧ АНАТОЛЬ МЕЧЫСЛАВАВІЧ, дзяржаўны сакратар Саюзнай дзяржавы Беларусі і Расіі МЕЗЕНЦАЎ ДЗМІТРЫЙ ФЁДАРАВІЧ, Надзвычайны і Паўнамоцны Пасол Расійскай Федэрацыі ў Рэспубліцы Беларусь ГРЫЗЛОЎ БАРЫС ВЯЧАСЛАВАВІЧ і мастацкі кіраўнік Санкт-Пецярбургскага Дома музыкі народны артыст Расійскай Федэрацыі РАЛДУГІН СЯРГЕЙ ПАЎЛАВІЧ.

«Амаль чвэрць стагоддзя прайшло з дня падпісання дамовы аб стварэнні Саюзнай дзяржавы і сённяшні канцэрт, прымеркаваны да гэтай падзеі, стаў бачным пацвярджэннем моцнага непарушнага сяброўства паміж народамі Беларусі і Расіі. Наша творчая сувязь умацоўваецца з году ў год не толькі на ўзроўні міністэрстваў, але і рэгіёнаў, мастацкіх калектываў і творчых асоб», – адзначыў Міністр культуры і асобна падзякаваў Пастаяннаму камітэту Саюзнай дзяржавы ў асобе Дзмітрыя Фёдаравіча Мезенцава за ўсеагульную і ўсялякую падтрымку ініцыятыў сфер культуры дзвюх дзяржаў.

«Для нас, беларусаў, – працягнуў Анатоль Мечыслававіч, – вялікі гонар прымаць лаўрэатаў конкурсу на легендарнай сцэне тэатра оперы і балета і быць гледачамі выступу выдатнага віяланчэліста, дырыжора, педагога, народнага артыста Расійскай Федэрацыі – Сяргея Ралдугіна.

Дзверы Вялікага тэатра заўсёды шырока адчынены для тых, хто імкнецца да прыгажосці і гармоніі. І я глыбока ўпэўнены, што імёны лаўрэатаў мы не аднойчы ўбачым на афішах тэатраў і самых знакавых пляцовак Расіі і замежжа».

Салісты:

ЛЕЎ ЖУРАЎСКІ (кларнет)

ГАННА КАМАРОВА (флейта)

РАВІЛЬ ІСЛЯМАЎ (скрыпка)

АЛЬБІНА ТОНКІХ (сапрана)

ІЛЛЯ ПАПАЯН (фартэпіяна)

Сімфанічны аркестр Вялікага тэатра Беларусі

Дырыжор - дыпламант міжнароднага конкурсу Юрый Караваеў.