Міністэрства культуры Рэспублікі Беларусь

На знакамітай Купалаўскай сцэне Зінаіда Зубкова бліскае многія гады, віртуозна пераўвасабляючыся ў гераінь твораў Я. Купалы, А. Дударава, М. Горкага, В. Розава, М. Матукоўскага.

Для кожнага персанажа спектакля яна знаходзіць асаблівую танальнасць, заўсёды здзіўляе і зачароўвае публіку.

Шчырымі душэўнымі словамі Міністр культуры павіншаваў Народную артыстку Беларусі з 85-гадовым юбілеем: “Вы - купалаўка ў поўным сэнсе гэтага слова, чалавек, які аддаў аднаму тэатру 63 гады і ні разу не здрадзіў ні роднай сцэне, ні сваім таварышам... Гледзячы ў Вашыя вочы, забываеш усе афіцыйныя прамовы. Хочацца гаварыць з Вамі проста, як з мамай, і шчыра, ад сыноўняга сэрца, сказаць: “Дзякуй!”. Дзякуй за талент, за няспынную працу і за чалавечнасць!" 

Анатоль Мечыслававіч абвясціў віншаванне ад Кіраўніка дзяржавы, у якім падкрэслены яе талент і бясцэнны ўклад у развіццё беларускага мастацтва: "Любоўю да Радзімы, гармоніяй і прыгажосцю напоўнена ўся Ваша творчасць. Яго адметнай рысай была і застаецца вернасць лепшым традыцыям айчыннай тэатральнай школы".

Ад імя ўсіх купалаўцаў актрысу павіншаваў дырэктар тэатра Аляксандр Віктаравіч Шастакоў, а рэктар Беларускай дзяржаўнай акадэміі мастацтваў Міхаіл Рыгоравіч Баразна нават зачытаў характарыстыку стараннай студэнткі акцёрскага курса тэатральна-мастацкага інстытута.

Сваімі акцёрскімі працамі не толькі ў тэатры, але і ў кіно Зінаіда Зубкова ўзбагаціла мастацтва нашай краіны! А сёння ўвечары яна выканала ролю Ганны ў спектаклі "Вечар"!.. Кранальна... Да глыбіні душы... Апладысменты не змаўкалі.