Названы пераможцы рэспубліканскага конкурсу "Чалавек Года культуры"
Журы назвала пераможцаў рэспубліканскага конкурсу ў 14 намінацыях. Перамога ў намінацыі "Выяўленчае мастацтва" прысуджана дацэнту кафедры скульптуры Беларускай дзяржаўнай акадэміі мастацтваў Аляксандру Фінскаму. Артыст-вакаліст (саліст), вядучы майстар сцэны Нацыянальнага акадэмічнага Вялікага тэатра оперы і балета Беларусі Юрый Гарадзецкі ўзнагароджаны ў намінацыі "Тэатральнае мастацтва". Галоўны дырыжор Нацыянальнага акадэмічнага народнага аркестра Рэспублікі Беларусь імя І.Жыновіча народны артыст Беларусі Міхаіл Казінец удастоены ўзнагароды ў намінацыі "Музычнае мастацтва". Артыст балета (саліст), вядучы майстар сцэны Нацыянальнага акадэмічнага Вялікага тэатра оперы і балета Беларусі народны артыст Беларусі Ігар Артамонаў стаў пераможцам у намінацыі "Харэаграфічнае мастацтва". Журы конкурсу прысудзіла ўзнагароду ў намінацыі "Эстраднае мастацтва" артыстцы-вакалістцы (салістцы) Маладзёжнага тэатра эстрады Вользе Вронскай, а ў намінацыі "Цыркавое мастацтва" - паветранай гімнастцы Беларускага дзяржаўнага цырка Алене Чухновай. Вядомы кінарэжысёр анімацыйных фільмаў Нацыянальнай кінастудыі "Беларусьфільм" Алена Пяткевіч удастоена перамогі ў намінацыі "Кінавідэамастацтва". У намінацыі "Музейная справа" лаўрэатам рэспубліканскага конкурсу названы генеральны дырэктар Нацыянальнага мастацкага музея Беларусі Уладзімір Пракапцоў.
Галіна Слесарэнка, дырэктар Барысаўскай цэнтральнай раённай бібліяткі імя Каладзеева - лаўрэат намінацыі "Бібліятэчная справа", а Алег Хмялькоў, дырэктар Магілёўскага абласнога метадычнага цэнтра народнай творчасці і культурна-асветнай работы - намінацыі "Клубная дзейнасць". Віншаванні прымаў таксама пераможца конкурсу ў намінацыі "Народная творчасць" намеснік старшыні савета Беларускага фонду культуры Тадэвуш Стружэцкі. Народны майстар, дырэктар Дома рамёстваў і фальклору Цэнтра традыцыйнай культуры і народнай творчасці Гарадоцкага раёна Віцебскай вобласці Марына Гушча перамагла ў намінацыі "Народнае дэкаратыўна-прыкладное мастацтва".
Высокую ацэнку за "Педагагічную дзейнасць з творчай моладдзю" атрымаў член прэзідыума праўлення Беларускага саюза музычных дзеячаў прафесар народны артыст Беларусі Яўген Гладкоў.
Аглядальнік БЕЛТА Жанна Катлярова стала пераможцам рэспубліканскага конкурсу "Чалавек Года культуры" ў намінацыі "Асвятленне пытанняў культуры ў сродках масавай інфармацыі". Журналіст працуе ў Беларускім тэлеграфным агенцтве з 2004 года. Цырымонія ўзнагароджвання пераможцаў рэспубліканскага конкурсу "Чалавек Года культуры" праходзіла ў Палацы мастацтваў у Бабруйску, які прыняў статус культурнай сталіцы Беларусі 2017 года.
