Міністэрства культуры Рэспублікі Беларусь

13 снежня 2023 г. прайшло пасяджэнне калегіі Міністэрства культуры Рэспублікі Беларусь па тэматыцы кадравага забеспячэння і падрыхтоўкі спецыялістаў у сферы культуры.

З прывітальным словам да ўдзельнікаў пасяджэння звярнуўся Міністр культуры Анатоль Мечыслававіч Маркевіч.

У сваёй прамове Міністрам былі абазначаны многія праблемныя аспекты, сярод якіх: замацаванне маладых спецыялістаў, магчымасці заахвочвання творчай моладзі, мэтавая падрыхтоўка, прафарыентацыйная дзейнасць і іншыя. Усе яны будуць падрабязна разгледжаны ў рамках пасяджэння калегіі. Анатоль Мечыслававіч таксама зрабіў акцэнт на тым, што кадравая палітыка патрабуе асаблівай увагі.

З дакладам «Аб кадравым забеспячэнні сферы культуры» выступіла Вольга Міхайлаўна Германовіч - начальнік аддзела кадравай работы і дзяржаўных узнагарод Міністэрства культуры.

Аб праведзеным аналізе работы, якая праводзіцца па падрыхтоўцы спецыялістаў для сферы культуры, расказала Марына Браніславаўна Юркевіч - начальнік аддзела ўстаноў адукацыі Міністэрства культуры.

Як і папярэдні аратар, акрамя канкрэтных фактаў і статыстычных даных у рамках тэматыкі даклада, яна ўказала на існуючыя праблемныя моманты (гэта і адток таленавітай моладзі, і неабходнасць узмацніць прафарыентацыйную работу, замацаванне спецыялістаў на месцах...), а таксама прапанавала шляхі іх вырашэння. 

Усе ўзнятыя пытанні абазначаны з мэтай разгляду і абмеркавання ўдзельнікамі пасяджэння, пошуку шляхоў іх вырашэння і па выніках паляпшэння забяспечанасці галіны кадрамі.

Міністр культуры ініцыяваў актыўнае абмеркаванне і ўсебаковы разгляд праблемных пытанняў адносна фінансавай часткі - стымулюючых выплат, тарыфных разрадаў, а таксама якасці павышэння кваліфікацыі, разнастайнасці культурнай прасторы. Анатоль Мечыслававіч арыентаваў прысутных на тое, што неабходна ўдасканаліць многія напрамкі работы галіны.

Пасля завяршэння пасяджэння былі канкрэтызаваны задачы і даручэнні, абазначаны рашэнні калегіі і тэрміны для іх выканання.